منتديات كوفي كوب Coffee cup - عرض مشاركة واحدة

12-05-11, 11:39 AM

ياسر التويجري

يا بنت وين الهوى موديك
بين الغواية و بين الدرك

لو لذّة الحب بالتشكيك ..!
كيف أتلذذ و أنا خابرك ..؟!

أنا تجنـّبت لا أشريك
عشان ما أضيق لو أخسرك

الحب بــ سياسة التمليك ...
كيف أملك أكثرك و أوفـّرك ..؟

إن كان ما يسترك ماضيك ..!
عباة الأوهام ما تسترك

هذي خفاياك و أساميك
و هذي جروحك و ذا خاطرك

كل شي ممكن أسوي فيك
إلا أني أقهرك ..؟! لا .. ما أقهرك

ليل الهواوي (( أنيق و شيك ))
و ليل المهجـّر (( عناد و عرك ))

يا طير .. ياللي تعبت أدعيك
يا مذيـّر الصيد , من ذيـّرك ..؟!

اللي بلا واجبٍ يعطيك
مايستحي منك لو يأمرك

بين الله يعزك و يحييك
أكبر أكاذيب و أصغر شرك

وإليا رفع راسك بناخيك
لا تشكره قبل لا تشكرك

بداية المجد .. في رجليك
ونهاية المجد .. في خنصرك

يا طير .. ياللي غدى مغديك
تعبت أدوّره و أدوّرك

يا ذا الزمن .. حدد معاديك ..؟
ذبحت يا ذا الزمن شاعرك

لي أربع سنين و أنا أرجيك
ولي أربع سنين وأنا أنطرك

وأنا لو أموت بين يديك ...
الله لا يرضى على خنجرك

النار .. شي من التكتيك
بين الغضى و الزناد الحرك

وأنا لو أثور و أجاريك
وين أقدر أروح من عسكرك

أكذب صداقة .. مع واليك
وأصدق صداقة .. مع دفترك

إذا غويت الرضى .. يغويك
وإذا غويت الزعل .. يدحرك

أحيان .. زود الأمل يعميك
وأحيان .. قِل الأمل ينصرك

وإن كان لا هب الهوى يغليك
لا تصغر إلا على مكابرك

وإن صرت لا هذي ولا هذيك ...
إقصر طموحك على باكرك