منتديات كوفي كوب Coffee cup

كيفكم اعضاء وزوار الكوفي
اول موضوع لي
اعجبتني القصيدة ونزلتها لكم

لا تمادى ف الأماني ..... والأماني مستحيله
لا توقف فالمسافه بين (إحساسي) و (ظله)

ايه ياللي تحسب اني رايقه.. شفني عليله
لا تصدق بإنني لا صرت اغني مسفهله

لي حبيب من فقدته .. صارت البسمة دخيله
ماخذ قلبي و خلا الجرح يدمي في محله

كان لا جاني عبوس ..راق لا فك الجديله
كيف لو جاني مروق .. يوم كلي رايق له؟

شامخه .. لكن مثله يستحق اني أجيله
ولو بغى راسي بكل العز ... خليته يتله

بس مدري وش بلا المحبوب شوفاته قليله
وفجأة ماعاد له شوفة ومدري وش حصل له؟

عادة الدنيا على العشاق فاللقيا بخيله
وإن بغت تجزل عطاها جابت هجوس ممله :-

(هو على عهده .. أو انه لاقي عني بديله؟؟
أو تناساني وانا اللي ذابحه نفسي وفا له ؟؟)

منبري عودي من الفرقا..وانا أصلا نحيله
ما درى بإن العطر مرهون به.. يومه يعله؟؟

بس اقلب ذكرياته .. ليلة من بعد ليله
والألم بعضه ترى يذبح .. أجل وشلون كله

يا ترى وش آخرة صبري على حمول ثقيله
هو بقى فالعين دمع ما نشف .. حتى أهله ؟

ورغم كل اللي حصل بآقولها .. (ياحبنيله)
ورغم كل اللي يبوني .. عفتهم بس فدوة له

اآه ياليت الشعر يجمع خليل مع خليله
كان ما خليت خل في الملا من دون خله

وانت ياللي لي تحجج بالهوى ..عطني دليله
مير يا كثر الهواويه و يا قل الأدله

أنت .. قد الحب.. يوم انك تجاهد في سبيله؟
والا ظنك..كل من جاهد يبي قلبي..وصل له؟!!!

جايز اني شاعرة واكتب احاسيس جميله
بس انا ماني مجرد شاعرة ..ياللي .. موله

مير دامك عاشق (شعري)..وأنا بنت أصيله؟
دوك شعري..واترك الخافق ترى منتب هل له

خلني عنك .. تراني واثقه ما لك وسيله
شف لك أية شاعره تنشر صورها في مجلة

إعرف انك يوم تحلم في غرام المستحيلة
لا تحرك لك من احساسي .. ولاحركت ظله

عبير بنت احمد