بسم الله الرحمن الرحيم
السلام عليكم ورحمة الله وبركاتهـ
هذا موضوع حبيت افتحه عن فئه من الناس متشددين بالدين يلقبون بالمطاوعه
انا ماراح اتكلم عنهم بشكل عام لانه بالعكس فيه الكثير والكثير منهم تاج على عيوننا وروسنا جميعا ولا احد يتجراء اصلا يقول حرف واحد على حماة الدين الله يديم عزهم.
يعني اوكي حنا عارفين قدرهم وحامدين ربنا كثير على النعمه اللي معطينا اياها لان كثير من المجتمعات تتمنى نص اللي عند السعوديه من المطاوعه
وعارفين وش اثرهم على المجتمع ووش حنا لولاهم
بس المشكله فيه قله منهم لاحشا مو كلهم فيهم عادات وطابيع ماادري وش تبي
فيجيك واحد متحجر يشوف العالم كله غلط وهو الصراط المستقيم شكاك في كل شي..و كل شي عنده حرام وغلط واللي هو يسويه بس صح
أول شي بتكلم على الي ينحطون على الراس
يعني مواقف كثيرهـ صارت معاي شخصيا منها:
مرهـ كنت واقف عند أشارهـ ورافع علي المسجل على الأخر شوي والا واحد يدق القزاز علي قلت بس رحت فيها
الا وهو مطوع من الهيئهـ
طبعا على طول طفيت المسجل ونزلت له عند الأشارهـ سلم علي ورديت السلام طبعا
قال الله يهديك يا ولدي لو أنك مبتلي مو لازم تسمع الناس معاك طبعا أنا مالي وجه ووجهي في الأرض
وكمل كلامه لين وصل وقال أصلا انت باين عليك ولد عالم وناس بس تعتبر شباب
ولله يهديك وجلس يدعيلي وعطاني شريط قرآن والله للحين عندي كل يوم وأنا رايح المدرسه أسمعهـ الصباح الله يجزاهـ خير يارب
وبرضو واحد ثاني في مجمع حياة مول
كنت مسوي سبايكي في شعري وجاني وقفني
وسلم ورديت
قال بسئلك سؤال وجاوبني بصراحهـ قلت تفضل
قال أنت الحين الي مسويه مقتنع فيه ولا تقليد طبعا سكت شوي ووجهي في الأرض قله كذ1 وكذ1
قال الله يهديك يعني لو الي تقلدهم يرمون نفسهم في النار تلحقهم طبعا قلت له لا
قال رح الله يستر عليك ويهديك يارب قلت له وياك
ويوم جيت بمشي قال ترا ريسنا متشدد لا يشوفك أطلع من المجمع أحسن لك قلت له ممششكور وطلعت
والحين بتكلم على الي مسوين فيها فاهمين وهم ما يعرفون الله وين حاطهم
برضو صارت مواقف كثيرهـ ومنها
كان فيهـ مؤتمر صحفي في برج الفيصليهـ ونسائي يعني كل الي فيهـ حريم فنانات وصحفيات وألخ ....
ويجوكم الي ما ينذكر أسمهم ويداهموهم وما خلو عليهم شي ليه ..؟ وين الغلط هناا
طبعا ما سكتو الي مسوين المؤتمر وصلوها للأمير سلمان
وموقف ثاني صار معاي أنا يوم الخميس الي هو أمس برضو عند مجمع حياة مول
طبعا عند المجمع حاطين باص ماشاء الله عليهم أي واحد يمر الباص على طول
وأنا كنت مع أهلي داخل المجمع وخلصو أهلي قلت بطلع اجيب السيارهـ عند البوابهـ لأني ملبق بعيد
المهم ما أمداني أطلع مع الباب ألا أثنين عسكري وموطوع ماسكيني تقولي مسوي جريمهـ
وعلى الباص على طول وانا أقول وش مسوي أنا طبعا ردهم أركب وأنت ساكت ركبت الباص
طبعا الباص فل ماشاء الله تقول رايحين الجهاد جوكي وين أثباتك قلت في السيارهـ
قال أأجل جوالك قلت مو من حقك تاخذهـ سكت طبعا قلت له وش مسوي أنا قال لرحت القسم تعرف أن شاء الله قلت يا أبن الحلال أهلي جوا وأنا طالع أجيبب السيارهـ قال خلهم يجون
قلت لا والله ما يجون هنا عند الباص سلامات قال أجل أنطق لين تروح القسم قلت اوكي
وطبعا يخلون عسكري في الباص على شان ما أحد ينحاش والباص الشباك حقهـ كبير
جلسنا نسولف مع العسكري وضحك وتنكيت على الباص طبعا انواع القرف جوا حر درايش مسكرهـ
وقلق
المهم قردنا العسكري لين رضى نفتح الدرايش قلت له الحين لو انحاش من الشباك وش تسون قال أبد في المسدس ست طلقات في رجولك ضحكت أنا
قلت له أجرب قال جرب وشف طبعا ما أمداه كمل كلامه ألا أنا ناط ومنحاش رحت السياره وجبتها عند الباب وهم مو عارفين وطلعو أهلي ومشيت
داري أقلقتكم بس من القهر والله
واخيرا
لكل من يقرا:لازم تجاوب ..
وشرايك بهالفئه من الناس..؟
اذكر لنا موقف حصل لك او لغيرك
نصيحه توجهها لهم
لكم ودي