[ ..
شبيه الريح
وش باقي من الآلام
والتجريح ؟
وش باقي من الأحلام ؟
وش باقي من الأوهام ؟
غير اني .. [
ألاقي في هجيرك فيّ
ألاقي في ظلامك ضيّ
وأوقد شمعتي في الريح
شبيه الريح
اذا تسمح بغيب شوي
ابجمع همي الباقي
وادفن صبري الذابل في أوراقي
و برجع لك اذا باقي بنفسك شي
شبيه الريح
أنا مقدر أكدر صفوك العاصف
شبيه الريح
أنا من لي سوى إحساسك الجارف ؟
بقايا زيف أشواقي
سما أمطار أحداقي
شبيه الريح وش باقي ؟
أبي أعرف
متى تسكن رياحك ؟
وأبي أعرف
غرورك هو متى يطلق سراحك ؟
وأبي أعرف
متى تعصف ؟
متى تعطف ؟
متى تنزف جراحك ؟
وأبي أعرف
إذا باقي في بحرك موج ] .. اكسر فيه مجدافي
وأبي أعرف
إذاباقي في همك هم ] .. ماشالته أكتافي
وأبي أعرف
إذا باقي في هالدنيا حزن .. [ مامرني واستوطن أطرافي ]
وأبي أعرف
إذا باقي من المعجز في هالدنيا
سوى العنقاء
والا الغول
والا [ خلك الوافي ]
بقايا زيف أشواقي
سما أمطار أحداقي
شبيه الريح وش باقي ؟
سنيني يم
وقلبي المركب المتعب وانت الريح
مجاديفي .. [ عذاب وهم
وزادي .. [ الوجد والتبريح
وصبري .. [ صبر بحّارة
بغوا في اليم محّارة
غشاهم موج كان من الغضب أغضب
وكانوا للهلاك أقرب
لولا كثروا التسبيح
شبيه الريح
حبيبي الأصدق الأكذب
عجزت اوصل شواطي طبعك الأعذب
تعبت [ .. أنطر في وسط العاصفة
قلب وشعور وعاطفة
تعبت [ .. أجمع ألم كل الموادع
في المواني وأحضن أطيافك
تعبت [ .. السهد في ليل الشوارع
والثواني تنطر انصافك
تعبت [ .. الظلم واجحافك
شبيه الريح
أنا ودي أكدر صفوك العاصف
شبيه الريح
أنا كني نسيت إحساسك الجارف
بقايا زيف أشواقي
سما أمطار أحداقي
شبيه الريح
كيف أسألك : وش باقي ؟
وأنا الباقي من إحساسي
[ ذرّته الريح ]
.. ]